فاریاب کې ترافیکي پېښې ۷ تنه ټپیان کړي دي
نن سهار په فاریاب ولایت کې د ترافیکي پېښې به امله ۷تنه ټپیان شوي دي.
د فاریاب ځایي سرچینو رسنیو ته ویلي، چې دا پېښه نن سهار د دغه ولایت په خواجه سبزپوش ولسوالۍ کې رامنځته شوې ده.
د سرچينې د معلوماتو له مخې، نن سهار د خواجه سبزپوش ولسوالۍ د بشت دښتې پر لویه لاره يو سراچه ډوله موټر له يوه بار وړونکي موټر سره ټکر کړى دى.
سرچینه زیاتوي، چې په دې پېښه کې د سراچې موټر د چلوونکي په ګډون ۷ تنه ټپیان شوي او د ټپیانو روغتیايي وضعیت نازک ښودل شوی دی.
سرچينې د دې پېښې لامل د دواړو موټرو د چلوونکو بې احتياطي بولي.