کابل ته د هند د بهرنيو چارو وزارت پلاوی راغلی
د سرپرست حکومت د بهرنيو چارو وزير د هندوستان د بهرنيو چارو وزارت له پلاوي سره ليدنه کړې.
د طالب سرپرست حکومت د بهرنيو چارو وزير امير خان متقي کابل ته د هندوستان راغلي پلاوي سره ليدنه کړې. بهرنيو چارو وزارت وايي، چې په ليدنه کې د افغانستان او هندوستان تر منځ پر دیپلوماتیکو اړیکو، دوه اړخیزه سوداګرۍ او بشري مرستو خبرې شوې دي.
ياد وزارت زياتوي، چې د سرپرست حکومت د بهرنیو چارو وزیر ټینګار کړی، څو هندوستان په افغانستان کې خپلې درول شوې پروژې بېرته بايد پيل کړي، خپل دیپلوماتیک حضور فعاله کړي او افغانانو ته قونسلګرۍ خدمات وړاندي کړي، په ځانګړې توګه د افغان محصلینو او ناروغانو لپاره.
د هندوستان پلاوي هم ويلي، چې دوی له افغانستان سره د پخوا په څیر ښې اړیکې غواړي او خپلو مرستو ته به دوام ورکوي.
د دوی په وینا، هندوستان به له افغانستان سره په بېلابېلو برخو کې پر مرستو او کار کولو غور وکړي او لکه څرنګه چې یې په دې وروستیو کې، د افغان صادراتو پر مخ خپل سرحدونه او بندرونه خلاص کړي، دغه صادرات د تیرو څو کلونو په پرتله زیات شوي او په همدې برخه کې به لا اسانتیاوي برابرې کړي، څو د افغانستان صادرات نور هم زیات شي او د افغانستان د اقتصاد په پښو ودرېږي.