د اوکراین جګړې په تړاو د انتونیو ګوتريش څرګندونې
ملګري ملتونه وايي، په راتلونکي نږدې وختونو کې د اوکراین جګړې د درېدو څرک نه لیدل کېږي.
د ملګرو ملتونو عمومي منشي انتونیو ګوتريش په يو تازه جوړ شوي خبري کنفرانس کې رسنيو ته په خبرو کې ويلي، چې د دوی هڅه دا ده، څو د اوکراین جګړه ودروي، خو په وينا يې نږدې وختونو کې د دې جګړې د درېدو څرک نه لیدل کېږي.
هغه زياتوي، چې خامخا به د اوکراین جګړه درېږي، خو په اوسني وخت کې يو لوری هم د دې جګړې درېدو ته چمتوالی نه ښيي.
ګوتريش همداراز ويلي، چې د جګړې درېدو لپاره د ملګرو ملتونو هڅې روانې دي.
ملګرو ملتونو عمومي منشي انتونیو ګوتريش دا څرګندونې داسې مهال کوي، چې په اوکراین کې د روسیې او اوکرايني پوځيانو ترمنځ کلکه جګړه روانه ده.
هاخوا اوکراينيان هم ادعا کوي، چې له خارکېف څخه يې يو ځل بيا روسي پوځيان په شا تمبولي دي.