يوناما د حجاب په اړه اندیښنه څرګنده کړې
يوناما د طالب سرپرست حکومت له لوري د حجاب په تړاو د وروستۍ پرېکړې په هکله اندیښنه څرګنده کړې ده.
په کابل کې د ملګرو ملتونو مرستندويه دفتر يا یوناما د ښځو د حجاب په هکله د طالب سرپرست حکومت پر وروستۍ پرېکړې ژوره اندیښنه څرګنده کړې ده.
يوناما د یوې اعلامیې په خپرولو سره ویلي، چې دا پرېکړه ښایي له نړۍوالې ټولنې سره د طالب سرپرست حکومت اړیکې نورې هم ترینګلې او ترمنځ یې واټن رامنځته کړي.
یوناما زياتوي، چې دوی به سمدستي له واکمنو چارواکو سره د ناستو غوښتنه وکړي؛ ترڅو د دغې پریکړې د دريځ په هکله نوره روښانتيا ترلاسه کړي.
دغه راز یوناما وايي، چې د نړۍوالې ټولنې له غړو سره به هم د دې پریکړې د اغیزو په هکله سلا مشورې وکړي.