د رينا امیري تازه څرګندونې
رینا امیري وايي، د طالب سرپرست حکومت سیاستونو نجونې او ښځې له زده کړو او کارکولو بې برخې کړې.
په افغانستان کې د نجونو د منځنۍ او لېسې دورې د ښوونځیو له نه پرانیستل کېدو څه باندې اته میاشتې تېرېږي، خو تر اوسه د پوهنې وزارت له لوري په دې تړاو وروستۍ پرېکړه نه ده په ډاګه شوې.
په ورته وخت کې ، د افغان نجونو او مېرمنو لپاره د امریکا ځانګړې استازې چې د اسلامي هېوادونو له یو شېر سفیرانو سره یې کتلي دي، وایي چې په دې کتنه کې هوکړه شوې ده چې اسلامي هېوادونه د افغان مېرمنو او نجونو له حقونو دفاع وکړي.
د افغان نجونو او مېرمنو لپاره د امریکا ځانګړې استازې رینا امیري وايي، هوکړه وشوه چې اسلامي نړۍ په افغانستان کې د ښځو او نجونو له حقونو دفاع وکړي.
د طالب سرپرست حکومت سیاستونو نجونې او ښځې له زده کړو او کارکولو بې برخې کړې دي. دا د نړۍ په هېڅ یوه هېواد کې چې اکثریت وګړي یې مسلمانان دي، نه لیدل کېږي.
د طالب سرپرست حکومت له لوري د نجونو ښوونځيو تړلو په تړاو په کور دننه او بهر د خلکو سخت غبرګونونه راپارول شوي دي، خو سربېره پر دې بيا هم ياد حکومت يې د خلاصېدو په اړه څه نه وايي.