د لوګر ښاروالۍ د ښار مارکیټونه وتړل
لوګر کې هغه مارکیټونه چي د ښاروالۍ نورمونو خلاف فعالیت درلود وتړل شول.
د طالبانو د سرپرست حکومت د لوګر د پل علم ښاروالۍ مسؤلین وایي، چې د ښاري نظم راوستلو لپاره د پل علم ښاروالۍ د کب میاشتې په ۱۶ مه نیټه په ښار کې د سوداګریزو مارکیټونو خاوندانو سره وکتل او لاندي تعهدات یي ور ځینې واخیستل.
۱- د شپې له خوا د مارکیټونو مخې ته د سړک او کوڅو روښانه کول.
۲- د مارکیټونو مخې ته د کثافت دانیو اېښودل.
3- د مارکیټونو د خدماتي ساحو کانکرېټ یا پاخه کول.
٤- د هغو غرفو او کراچيو ثبتول چې د مارکیټونو په خدماتي ساحو کې فعاليت کوي.
۵- د مارکیټونو د اوسیدونکو لپاره د تشنابونو جوړول.
۶- ښاروالۍ ته د مارکیټونو د صفايي محصول تحویلول.
د لوګر د ښاروالۍ مسؤلین زیاتوي، چې د پورتنیو تعهداتو د ترسره کولو لپاره دوی ته ۱۵ ورځې وخت هم ورکړل شوی وو، خو دوی په یادو تعهداتو عمل نه و کړی او د نه ترسره کېدو سره یې مارکیټونه مهر و لاک شول.
د لوګر د ښاروالۍ معاون رفیع الله احمدزي پنجره ورځپاڼې ته وویل، تر څو چې د مارکیټونو خاوندان په یادوتعهداتو عمل و نه کړي مارکیټونه او په مارکیټونو کې هټۍ به تړل شوې وي.
هغه زیاتوي چې دوی قانون په ټولو یو ټول عملي کوي ترڅو لوګر یو منظم او پاک ښار ولري.