لوګر کې د لیک لوست زده کړې ۳ کورسونه پرانیستل شول
د طالبانو د سرپرست حکومت د لوګر د پوهنې ریاست مسؤلین وایي، چې په دې ولایت کې، له زده کړو بې برخې ماشومانو ته د لیک لوست زده کړې ۳ کورسونه پرانیستل شول.
هغوئ زیاتوي چې دا کورسونه د پوهنې ریاست د لیک لوست زده کړې آمریت له لوري جوړ شوي چې ۹ میاشتې به دوام وکړي.
دغه کورسونه ۲ د مرکز پل علم په التمور او یو بل د برکي برک ولسوالۍ د پندې په سیمه کې جوړ شوی دی، چې په دې سره ۱۳۰ ماشومانو ته د لومړنیو زده کړو زمینه برابره شوې ده.
د یادو کورسونو ښوونکو او زده کوونکو ته درسي توکي د پوهنې ریاست د لیک لوست زده کړې آمریت له لوري ورکړل شوي دي.
دا په داسې حال کې ده، چې تر دې وړاندې هم د لوګر په خروار ولسوالۍ کې ماشومانو ته د لومړنیو زده کړو ۵ کورسونه جوړ شوي و.