بلوچستان ایالت کې پنځه پاکستاني پوځيان وژل شوي
پنجره ورځپاڼه: پاکستاني رسنۍ وايي، چې د بلوچستان ایالت د کاهان ولسوالۍ په کوهلو سیمه کې د پاکستاني پوځيانو د موټرو پر کاروان برید شوی، چې په نتيجه کې یې پنځه تنه وژل شوي او ګڼ نور ټپيان دي.
پاکستاني رسنۍ وايي، چې دا په روانه اونۍ کې د دغه هېواد بلوچستان ایالت کې پر پوځيانو دويم برید دی، چې ترسره کېږي.
سرچينې زياتوي، چې تر دې وړاندې د بلوچستان کیچ سیمه کې هم پر پاکستاني پوځیانو برید شوی او د دغه پوځ څلور تنه يې وژلي وو.
دا په داسې حال کې ده، چې د پاکستان پوځ د روانې ډیسمبر میاشتې له ۲۴مې راهیسې د دغه هېواد په ځینو سیمو کې د وسلوالو پر ضد چاڼیز عملیات پیل کړي دي.
بلخوا بيا پاکستاني طالبانو هم د پاکستان حکومت پرضد د بریدونو پیلولو اخطار ورکړی او ويلي دي، چې چې دا بريدونه به دوام ولري.
د تازه برید مسؤولیت د بلوڅ ازادۍ پوځ ډلې منلی او د یوه مشر په شمول یې د اتو پوځیانو د وژلو او دریو نورو ټپي کولو ادعا هم کړې ده.