رهبران دولت تاجیکستان و پاکستان روی تشکیل دولت فراگیر در افغانستان تأکید کردند

امام‌علی رحمان، رییس جمهور تاجیکستان، در سفر به اسلام‌آباد با شهباز شریف، نخست‌وزیر پاکستان دیدار کرد و هردو طرف روی همکاری‌های مشترک «سیاسی – امنیتی و‌ موضع مشترک‌« در قبال افغانستان توافق کردند.

شهباز شریف، نخست‌وزیر پاکستان و امام علی رحمان، رییس‌جمهور تاجیکستان در یک بیانیه‌ای مشترک، افغانستان صلح‌آمیز و باثبات را بنیاد توسعه‌ی منطقه خوانده و بر ایجاد حکومت فراگیر در این کشور تأکید کرده‌اند.

رحمان در سخنرانی‌اش در اسلا‌م‌آباد گفت که در جریان مذاکرات، ما به تفصیل در مورد مسایل همکاری‌های امنیتی، تداوم مقاومت مشترک در برابر خطرات و تهدیدات مدرن از جمله تروریسم، افراط‌گرایی، هر گونه مظاهر افراط‌‌گرایی و جنایات سازمان‌یافته فرامرزی، قاچاق اسلحه، مواد مخدر و جرایم سایبری گفتگو صورت گرفت.

امام‌علی رحمان که به اسلام‌آباد سفر کرده، در یک نشست خبری گفت که پاکستان و تاجیکستان بیش از همه علاقمند به بازگرداندن صلح و ثبات پایدار در «سرزمین مصیبت‌زده‌» افغانستان اند.

سران تاجیکستان و پاکستان بر اجرای هرچه زودتر پروژه‌ انرژی کاسا یک هزار نیز تأکید کرده‌اند.