جرمني نور د افغانانو نوي غوښتنليکونه نه مني
د جرمني فدرالي حکومت د کورنیو چارو وزارت د يوې تازه خبرپاڼې په خپرولو سره ويلي، هغه افغانان، چې په افغانستان کې له ګواښ سره مخ دي، دوی ته دې له دغه هېواده د اېستلو په اړه نور نوي غوښتنليکونه نه استوي.
په خبرپاڼه کې راغلي، چې جرمني د اوس لپاره افغانستان کې له ګواښ سره مخ افغانانو د اېستلو لپاره نوي او فردي غوښتنليکونه نه شي منلی.
خبرپاڼه زياتوي، چې له جرمني سره يو شمېر معتبر سازمانونه او بنسټونه کار کوي او هغوی د هغو افغانانو اسنادونه څيړي، چې لا له وړاندې ورته رسيدلي دي.
د جرمني د کورنیو چارو وزارت په وينا، هغه ادارې چې له دوی سره کار کوي تر خپلو څيړنو وروسته اسناد دوی ته سپاري او نوره پروسه يې بيا د حکومت له لوري پر مخ وړل کېږي.
تر دې وړاندې د جرمني حکومت اعلان کړی و، چې تر ۲۰۲۵ کال پورې به هره میاشت ۱۰۰۰ هغه افغانان، چې خپل هېواد کې له ګواښ سره مخ وي، دغه هېواد ته انتقال کړي.