طالبان مغاره‌نشین‌های بامیان را کوچ اجباری می‌دهد
طالبان در ولایت بامیان در مرکز کشور، ده‌ها خانواده مغاره‌نشین را مجبور به کوچ اجباری کرده‌اند.
از صبح امروز (دوشنبه، چهارم میزان ۱۴۰۱ خورشیدی) یک نوار تصویری در شبکه‌های اجتماعی دست به دست می‌شود که در آن دو زن ادعا می‌کنند که طالبان خانواده‌های مغاره‌نشین را مجبور به کوچ از مغاره‌ها کرده‌اند.
یکی از این زنان می‌گوید که طالبان به آنها هشدار داده‌اند که مغاره‌ها را ترک کنید و اگر ترک نکنید «دهان تان را پر مرمی (گلوله) می‌کنیم.»
بیش از سه صد خانواده در ولایت بامیان در مرکز کشور به دلیل فقر و نداشتن سرپناه، در مغاره‌های اطراف مجسمه‌های تاریخی بودا زندگی می‌کنند.
طالبان اکنون این مغاره نشینان را مجبور به کوچ اجباری کرده‌اند و آنها می‌گویند که نمی‌دانند در کجا پناه بگیرند.