لوګر کې سېلاوونو درانه زیانونه اړولي دي
تېره شپه لوګر کې سېلاوونو خلکو ته ډېر درانه مالي او ځاني زیانونه اړولي دي.
تېره شپه د لوګر ولایت په مرکز پل علم او ولسوالیو کې سختو سېلاوونو خلکو ته د درنو مالي زیانونو تر څنګ درنه مرګ ژوبله هم اړولې ده.
د لومړنیو معلوماتو له مخې، د دغه ولایت د خوښۍ په ولسوالۍ کې تر 800 زیات کورونه په بشپړه توګه له منځه تللي او لسګونه ماشومان او ښځې وژل شوې دي.
د سیمې خلک وایي، دغو کورنیو ته تر اوسه هېڅ لومړنۍ مرسته نه ده رسېدلې.
د سیمې خلک دغه راز وایي، چې زیات شمېر کسان له تېرې شپې راهیسې په لوږه د خپلو شهیدانو او زخمیانو په لټه کې دي، هغوی له طالب سرپرست حکومت او مرستندویه بنسټونو څخه د بېړنۍ مرستې غوښتنه کوي.