په افغانستان کې دې بحثونه پيل شي
امریکا وایي په افغانستان کې دې هم د اوسلو په څېر بحثونو او مذاکراتو ته زمینه برابره شي.
د افغان مېرمنو د حقونو په برخه کې د امریکا ځانګړې استازې رینا امیري خپلو تازه څرګندونو کې ویلي، چې د اوسلو غونډه د بشري حقونو او په تېره بیا د مېرمنو د حقونو د خونديتوب لپاره يو غوره فرصت دی.
د نوموړې په وینا په دې مذاکراتو کې مېرمنو خپلې غوښتنې مطرحه کړې دي او د بحثونو دوام د ټولو اړخونو په ګټه دی.
مېرمن امیري وایي په افغانستان کې بشري وضعیت ترینګلی دی نو د ښه کولو لپاره یې یوازینۍ لار خبرې او بحثونه دي.
امیري همدراز ویلي مونږ تمه لرو چې د اوسلو په څېر د بېلو قشرونو ترمنځ د خبرو لړۍ افغانستان ته هم راشي او بېل اړخونه دې د خبرو له لارې خپل نظریات يو بل سره شریک کړي.