د اړمنو افغانانو لپاره د نقدو پیسو برابرول
ناروې له نړیوالو هیوادونو څخه غوښتي چې د اړمنو افغانانو لپاره د نقدو پیسو په برابرولو کې له ملګرو ملتونو سره مرسته وکړي.
دغه هیواد ویلي چې نقدي پیسې به په مستقیم ډول پر اړمنو افغانانو ووېشل شي ترڅو ژمی یې د مړینې لامل نشي.
د ناروې د بهرنیو چارو وزیر هنیکن هیوتفلت د نومبر ۱۶ (لړم ۲۵) رویټرز خبري آژانس ته ویلي چې هیواد یې د افغانستان لپاره د ملګرو ملتونو له بودجې سره د ۲۳ میلیونه ډالرو ژمنه کړې ده.
هغه زیاته کړې: “موږ ټول هیوادونه هڅوو چې په ورته اقدام لاس پوري کړي ترڅو ونډه واخلي او د یو لوی بشري ناورین او بالقوه قحطۍ څخه مخنیوی وشي.”
په افغانستان کې د خراب اقتصادي وضعیت په رامنځته کېدو سره ملګرو ملتونو تیره میاشت اړمنو کورنیو ته په مستقیم ډول د مرستو رسولو په هدف مرستندویه صندوق رامنځته کړ.
ټاکل شوې نن چهارشنبه د ملګرو ملتونو امنیت شورا د افغانستان په اړه غونډه وکړي، د ناروې د بهرنیو وچارو وزیر به تمه وښيي چې په یاده ناسته کې افغانستان ته هم پاملرنه وشي.
د ملګرو ملتونو سازمان ویلي چې په افغانستان کې قحطۍ ته د نژدې کسانو شمېر ۸.۷ میلیونه ته رسیږي دغه شمېر د روان کال لومړیو ته درې میلیونه زیات شوی دی.
د خوړو نړیوال پروګرام د معلوماتو په اساس د افغانستان شااوخوا ۲۴ میلیونه کسان یا د دغه هیواد ۶۰ سلنه نفوس له سختې لوږې سره مخ دی.دغه نړیوال پروګرام خبرداری ورکړی چې دروان کال تر پایه به ۹۷سلنه افغانان د فقر تر کرښې لاندې ژوند وکړي.
دغه نړیوال سازمان ویلي چې د روان میلادي کال تر پایه به تر پنځه کلنۍ کښته شااوخوا ۳.۲ میلیون ماشومان په خوراځواکۍ اخته شي.