نيمروز کې درې انساني قاچاقبران نیول شوي
طالبانو په نيمروز ولايت کې درې تنه انساني قاچاقبران د ايران پر پوله نيولي دي.
د طالبانو د سرپرست حکومت د نیمروز د سرحدي پولیسو د دریمې حوزې امر محمد ابراهیم هیواد رسنیو ته ویلي، چې یادو کسانو د خپلو معلوماتو پر اساس هره شپه سلګونه کسان په مهارت سره له هېواده بهر قاچاق کول.
د هیواد په خبره، نیول شوي قاچاق وړونکي له مسافرو سره د نیمروز مرکز ته وړل شوي دي.
د طالبانو د حکومت د نیمروز مسوولین وایي، چې دوی هره ورځ هڅه کوي څو له هیواد څخه پر قاچاقي لارو د تلوونکو کسانو او قاچاقبرانو مخه ونیسي.