ايران کې لاريون کوونکو سره د پوليسو غبرګون نامناسب دی
جوزېف بورل وايي، د ايراني لاريونکوونکو پر وړاندې د زور زياتي کارول هیڅ د منلو وړ نه دی.
د اروپايي ټولنې د بهرني سياست مشر، جوزېف بورل وايي، چې ایران کې د لاريونکوونکو پر وړاندې د زور زياتي کارول او له هغوی سره ناسم چلند کول هیڅ د منلو وړ نه دی.
بورل ويلي، چې د ايران د پوليسو او امنيتي ځواکونو غبرګون نامناسب دی او د دوی دا کړنه د دې لامل شوې چې ځاني تلفات رامنځته شي، ډېر شمېر وګړي ووژل او ټپیان شي.
هغه همداراز ټينګار کړی، چې يوه بله اندېښنه پر لاريون کوونکو د انټرنېټي خدمتونو محدودل دي او په دې سره ايراني چارواکي په څرګند ډول د بيان ازادي نقض کوي.
جوزېف بورل زياتوي، چې ايرانيان هم د نورو ځايونو د وګړو په څېر د سولهييز لاريون حق لري. دغه حق بايد په هر ډول شرايطو کې تضمين شي.
ايران کې د اخلاقي پوليسو له لوري د مهسا اميني په وژلو سره لاريونونه پيل شوي، چې تر دې دمه يې له امله شاوخوا ۵۰ تنه لاريونکوونکو خپل ژوند بايللی لسګونه نور ټپيان شوي دي.