د قطر پاچا: امریکا او طالبان دې د دوحې هوکړې ته ژمن پاتې شي
د قطر پاچا وايي، چې نړۍوال دې نه پرېږدئ، څو افغانستان يو ځل بيا د ترهګرو پر پټنځای بدل شي.
د قطر پاچا تمیم بن حمد آل ثاني د ملګرو ملتونو په عمومي غونډه کې د خپلې وينا پر مهال ويلي، چې نړۍوال دې نه پرېږدئ، څو افغانستان یو ځل بیا د ترهګرو پر پټنځای بدل شي.
د قطر پاچا د ملګرو د ملتونو ۷۷مې عمومي غونډې ته په وينا کې له امریکا او طالبانو غوښتي، چې د دوحې هوکړې ته دې ژمن پاتې شي.
نوموړي زیاته کړې، چې مونږ له طالبانو غواړو، څو په افغانستان کې بشرحقونو په ځانګړې توګه د ښځو حقونو ته درناوی وکړي، مذاکراتو او ښځو ته د زده کړو او کار ته اجازه ورکړي.
هغه همداراز د نړۍ له لوري د افغانستان منزوي کېدو پر خطرونو او راتلونکې پايلو هم اندېښنه څرګنده کړې ده.
په ورته وخت کې د طالب سرپرست حکومت مرستیال ویاند بلال کریمي بیا د قطر د امیر د څرګندونو په غبرګون کې ویلي، چې اوس په افغانستان امن دی او د دغه هېواد خاوره به د نړۍ د بل هېڅ هېواد پر ضد ونه کارول شي.
هغه همداراز ټينګار کړی، چې په افغانستان کې هېڅ داسې بله ډله نشته، چې کوم بل هېواد ته دې ګواښ رامنځته کړي.