راشدخان د هند کرېکټ لیګ سیالیو د لومړۍ لوبې غوره لوبغاړی شو
پنجره ورځپاڼه: د ا فغانستان د کرېکټ اتل ستوری راشدخان د هندوستان د کرېکټ شل اووریزو سوداګریزو سیالیو په لومړۍ لوبه کې د لوبې غوره لوبغاړی اعلان شو. د هند سوداګریز لیګ کرکټ سیالۍ یا IPL تېر ماښام د افغانستان په وخت د ماښام په شپږ نيمې بجې پيل شوې.
د دې سیالیو لومړۍ لوبه د راشدخان د لوبډلې ګجرات او د چنایي لوبډلو ترمنځ ترسره شوه، د لوبې پچه یا ټاس د ګجرات لوبډلې وګټله او لومړی یې د توپ اچونې پرېکړه وکړه.
د چنایي سوپر کینګ لوبډلې په ټاکل شویو ۲۰ اورونو کې د اوو لوبغاړو په سوځېدلو سره ۱۷۸ منډې جوړې کړې او ګجرات ته یې د ۱۷۹ منډو هدف ورکړ.
د ګجرات افغان لوبغاړي راشد خان ډیره ښه توپ اچونه وکړه، په څلورو اورونو کې یې ۲۶ منډې وکړې او د چنایي دوه پیاوړي لوبغاړي وسوځول.
د ګجرات لوبډلې یاد هدف په شلم اوور کې د څلورو لوبغاړو په سوځېدلو سره ترلاسه او لوبه یې وګټله. راشد خان په داسې حال کې چې د ګجرات لوبډلې ته په کمو توپونو زیاتې منډې پکار وې، په نولسم اوور کې یوه شپږیزه او یوه څلوریزه ووهله او لوبه یې خپلې لوبډلې ته اسانه کړه.