نزدیک به 200 مهاجر افغان از سوی تاجیکستان اخراج شده است
یک رسانه امریکایی از اخراج نزدیک به 200 پناهجوی افغان در سه هفته اخیر از سوی دولت تاجیکستان خبر داده است.
این رسانه امریکایی(یوراسیا.نت) در گزارشی نوشته که شماری از خانواده‌های پناهنده نیز به دلیل ترس از اخراج اجباری، به سفارت افغانستان در تاجیکستان پناه برده‌اند.
سازمان‌هایی که با پناهندگان افغان کار می‌کنند، به آنها توصیه کرده‌اند تا از ترک خانه، به استثنای وضعیت کاملاً ضروری، خودداری کنند.
یک پناهجوی افغان که خواسته نامش فاش نشود، به این رسانه امریکایی گفته است: « امروز سه نفر از همسایه‌هایم اخراج شدند. تاکنون هیچ اطلاعی در مورد دلایل اخراج آنان ارائه نشده است».
شماری از پناهجویان افغان در تاجیکستان پیش از این به رسانه‌ها گفته بودند که با وجود داشتن اسناد قانونی کمیساری عالی پناهندگان سازمان ملل، تاجیکستان با جبر و برخورد خشن دست به اخراج آنان زده است.
آنها گفته اند که تمام دارایی‌های‌شان ضبط شده و به افغانستان فرستاده می‌شوند.
در آغاز سال جاری، سفارت افغانستان در تاجیکستان اعلام کرد که حدود ده هزار مهاجر افغانستانی در این کشور حضور دارد. از آن زمان حدود ۴۰۰۰ نفر آنها اقامت کانادا را کسب کرده‌اند.
کمیساری عالی پناهنگان سازمان ملل اخیراً از تاجیکستان خواست تا اخراج اجباری پناهجویان افغان را متوقف کند.
این کمیساری در اعلامیه‌ای گفته است که «بازداشت و اخراج پناهجویان» زندگی آنها را با خطر مواجه می‌سازد.