ندا محمد ندیم: منتقدان حکومت طالبان «واجب‌القتل» اند
ندا محمد ندیم، سرپرست وزارت تحصیلات طالبان گفته کسانی که با «قلم» یا غیر از آن به‌منظور «تخریب نظام» تلاش می‌کنند «واجب‌القتل» هستند.
او روز یک‌شنبه، بیست‌ویکم حوت در مراسم فراغت مفتی‌ها و قاضیان سخنرانی کرده و خطاب به منتقدان طالبان گفته که به «مقابله» و «سرکوب‌تان» آماده هستیم.
مولوی ندامحمد ندیم گفته است: «شما به سرتمبه‌گی خود رو می‌آورید، با دسیسه‌های بیگانه‌گان به مردم افغانستان مشکلات ایجاد می‌کنید، باز ان‌شاءالله ما به مقابله نیز آماده استیم و به سرکوب تان نیز آماده استیم.»
آقای ندیم که به خاطر اقداماتش در راس وزارت تحصیلات، زنان و دختران را از تحصیل محروم کرده اخیرا از سوی اتحادیه اروپا تحریم شده است.
او در سخنرانی خود به شخص یا نهاد خاصی اشاره نکرده اما هشدار داده است که «تخریب نظام» چه به صورت عملی باشد یا غیر از آن واجب‌القتل پنداشته می‌شود.
سرپرست وزارت تحصیلات همچنان گفته که «تخریب کننده نظام اگر به زبان باشد، اگر با قلم باشد یا تخریب عملی می‌کند، تمامی آنان کسانی استند که واجب القتل پنداشته می‌شوند.»
پیش از این نیز ملاهای حامی طالبان فتوا داده بودند که منتقدان «نظام امارت اسلامی» باید سر زده شوند.