پخواني افغان چارواکي په بهر کې د ميليونونو ډالرو کورونه لري
وال سټريټ ژورنال ورځپاڼه راپور ور کړی، چې يو شمېر پخوانيو افغان چارواکو په بهر کې د ميليونونو ډالرو په ارزښت کورونه جوړ لري.
د وال سټريټ ژورنال ورځپاڼې په تازه راپور کې راغلي، چې يو شمېر پخواني افغان چارواکي په بهرنيو هېوادونو کې د ميليونونو ډالرو په ارزښت کورونه لري او هلته له خپلو کورنيو سره ګډ ژوند کوي.
ياده ورځپاڼه وايي، چې دغو پخوانيو لوړپوړو چارواکو د طالب سرپرست حکومت له واکمنېدو وړاندې په امريکا، ترکيې، متحده عربي اماراتو او يو شمېر نورو هېوادونو کې د ميليونونو ډالرو په ارزښت ښايسته او شانداره کورونه اخيستي او له خپلو کورنيو سره ګډ ژوند په کې کوي.
همداراز دغه راپور د اسنادو، مرکو او نورو شواهدو پر بنسټ جوړ شوی دی.
د وال سټريټ ژورنال ورځپاڼې د راپور له مخې د پخواني ولسمشر محمد اشرف غني ته يو شمېر نږدې کسان، جهادي رهبران او د افغانستان د ملي شورا پخواني غړي په بهرنيو هېوادونو کې په شاندارو کورونو کې ژوند کوي.
په دغو کسانو کې عبدالرشید دوستم، عطامحمد نور، د ماليې وزارت پخواني وزيران هر يو اکليل حکيمي او خالد پاينده، د اقتصاد وزير مصطفی مستور او د ملي امنیت پخوانی سلاکار حمدالله محب هغه کسان دي، چې وال سټريټ ژورنال يې په اړه څېړنه کړې او په دې راپور کې يې نومونه اخيستل شوي.