کندهار کې د افغان ترک لیسې مرستيال وژل شوی
پنجره ورځپاڼه: په کندهار ولایت کې دافغان ترک لېسې مرستيال وژل شوی دی
په دغه ولايت کې يوه سيمه ييزه سرچينه وايي، نامعلومه وسله والو تيره ورځ ناوخته په عينو مېنه کې د افغان ترک لېسې مرستيال مدير ارشاد احمد فضلي په مرموز ډول وژلی او له سيمې تښتېدلي دي.
د سرچينې په خبره، چې د وژل شوي کس جسد د دې ولايت ميرويس حوزوي روغتون ته لېږدول شوی.
د سيمي د خلکو د معلوماتو له مخې، د وژل شوي کس موبایل هم وسلهوالو کسانو له ځان سره وړی دی.
په ورته وخت کې کندهار کې ځايي چارواکي هم دغه پيښه تاييدوي او زياتوي، چې دوی د وژنې د عاملينو په پلټنه بوخت دي.
د کندهار د امنيه قومندانۍ وياند محمداصف حکيمي پنجري ورځپاڼې سره په خبرو کې وويل، چې د وژل شوي کس جسد د عينو ميني په يو داسي ځاي کې موندل شوی، چې د خلکو ګڼ ګوڼه په کې نه وه.
هغه وايي دوی دا مهال د پيښې د اصلي لامل او عاملينو په پلټنه بوخت دی.
د يادونې ده، په کندهار کې دا لومړی ځل نه دی، چې د يوې خصوصي لېسې مدير وژل کېږي، بلکې تر دې وړاندې هم ورته جنایي پېښې ترسره شوي دي.
خبريال: رضوان پوپل