افغانستان ته ۴۰ ميليونه نور ډالر هم راورسېدل
افغانستان سره د نړۍوالې ټولنې لخوا د نغدي مرستو په لړ کې نن د ۴۰ ميليونه ډالرو بله کڅوړه هم راورسېده.
د افغانستان مرکزي بانک د يوې تازه خبرپاڼې په خپرولو سره ويلي، چې نن یکشنبه د لړم پر ۲۲مه د ۴۰ میلیونه امریکايي ډالرو بله کڅوړه هم کابل ته رارسیدلې ده.
د يادونې ده، چې افغانستان ته تر دې دمه د ۴۰ میلیونه ډالرو ۱۵ او د ۳۲ میلیون ډالرو له ۳۰ زیاتې کڅوړې راوړل شوې دي.
د طالبانو تر کنترول لاندې د مرکزي بانک د شمېرو له مخې، پر افغانستان د طالبانو له بیاځلي واکمنېدو وروسته د نړۍوالې ټولنې د نغدي مرستو مجموعي اندازه څه باندې یو میلیارد او ۵۵۳ میلیون ډالرو ته رسېدلې ده.
همداراز د دغو پیسو د سرچینو او د کارونې په اړه هیڅ راز معلومات نه نشته، خو په افغانستان کې د ملګرو ملتونو مرستندوی دفتر يا یوناما بيا څه موده مخکې ویلي و، چې دا پیسې په یو سوداګریز بانک کې زیرمه شوي او طالبان ورته لاسرسی نه لري.