د ښوونځيو په هکله اته کسيزه کميټه جوړېږي
طالبان وايي، چې د نجونو ښوونځیو د پرانیستلو په اړه يوه اته کسیزې کمېټه جوړوي.
طالب سرپرست حکومت وايي، چې په هېواد کې له شپږم ټولګي پورته د نجونو ښوونځیو د بیا پرانیستلو په موخه د سترې محکمې د رئيس عبدالحکیم په مشرۍ یوه اته کسیزه کمېټه جوړوي.
د طالب سرپرست حکومت مرستيال وياند وايي، د دې اته کسيزې کميټې ټول غړي پوهان او دیني عالمان دي.
ياد حکومت د دې کمیټې د جوړیدو داسې مهال خبر ورکوي، چې له ۲۵۱ ورځو وروسته لا هم د شپږم ټولګي پورته د نجونو پر مخ د ښوونځيو دروازې بندې دي.
زيات شمېر افغان نجونې د خپلو ښوونځيو د پرانيستلو لپاره په بې صبرۍ په تمه دي او غواړي طالبان ورته تګ اجازه ورکړي، څو د پخوا په څېر يو ځل بيا خپلو زده کړو ته دوام ورکړي.
دا په داسې حال کې ده، چې تر دې وړاندې د مريم لېسې مخې ته يو شمېر ښځو د نجونو ښوونځيو د تړلو په دوام لاريون وکړ، خو دوی د طالبانو له لوري ووهل شوې او پرې نه ښودل شوې، څو لاريون ته دوام ورکړي.