ننګرهار کې یو ډاکټر وژل شوی دی

ننګرهار کې نامعلومو وسله والو د ننګرهار پوهنتون تدریسي روغتون یو ډاکټر په ډزو وژلی او وراره یې ټپي کړی دی.

د ننګرهار ځایي سرچینې وایي، چې د دې ولایت په مرکز جلال اباد ښار کې د نورمحمد ملکزي په نوم یو ډاکټر تېر ماښام مهال د نامعلومو کسانو له لوري په ډزو وژل شوی او وراره یې ټپي کړی دی.

سرچینې زیاتوي، چې نورمحمد ملکزی د ننګرهار پوهنتون د تدریسي روغتون د عمومي جراحي څانګې مسؤل و، چې تېر ماښام کورته د تګ پر مهال له خپل وراره سره یو ځای په وسله وال برید کې وژل شوی او وراره یې ټپي شوی دی.

طالب چارواکو د یاد ډاکټر د وژلو په تړاو تر اوسه رسنیو ته څه نه دي ویلي.
دا په داسې حال کې ده، چې دوه ورځې وړاندې په سمنګان ولایت کې هم نامعلومو وسله والو پنځه تنه په ډزو وژلي وو.