پاکستاني طالبانو بيا د جنګ اعلان وکړ
پاکستاني طالبانو تازه د یوې اعلامیې په خپرولو سره بيا اعلان کړی چې د پاکستاني پوځ سره یو میاشتنی اوربند نور نه غځوي او جګړې ته دوام ورکوي.
ياد اوربند د نومبر له ۹ مې د ډيسمبر تر ۹ مې پورې و، چې پرون یې وروستۍ ورځ وه.
پاکستاني طالبانو ادعا کړې چې د پاکستان پوځ ورسره منافقت کوي او پر اوربند سربېره یې د دوی ملګري په نښه کړي دي او بندیان یې هم نه دي ورخوشې کړي.
پاکستاني طالبانو يو ځل بیا پر دې ټينګار کړی چې د پاکستان اوسنی حکومت يو غير اسلامي دی او وايي چې په دغه هېواد کې اسلامي حکومت رامنځته کوو.
د يادونې وړ ده چې د پاکستاني طالبانو او پوځ ترمنځ د خبرو منځګړيتوب افغان طالبانو کاوه.