لوګر کې د مس عینک کان د استخراج چارې پیلېږي
د طالبانو د سرپرست حکومت د کانونو او پټرولیم وزارت چارواکي وایي، چې په لوګر کې د مس عینک کان د استخراج چارې به ډېر ژر پیل شي.
د دغه وزارت ویاند مولوي برهان ویلي، چې د یاد کان تړون له MCC چینایي کمپنۍ سره لاسلیک شوی دی، چې د استخراج چارې به یې په راتلونکو څو ورځو کې پیل شي.
د لوګر د مس عینک کان ۲۴۰ میلیونه ټنه اټکل شوی دی، چې د مسو ارزښت یې ۵۰ میلیارده ډالره کېږي.
مولوي برهان وایي، چې MCC چینایي کمپنۍ له طالبانو سره په اړیکه کې ده او د کان د استخراج لپاره یې بشپړ چمتوالی ښودلی دی.
دغه کمپنۍ وایي، چې د دوه میلیارده او نهه سوه میلیون ډالرو په پانګونې سره به ژر د یاد کان د استخراج چارې پیل کړي.
طالبانو ویلي چې د دې کان د استخراج په پیلېدو سره به په مستقیم او غیر مستقیم ډول نږدې پنځوس زرو کسانو ته د کار زمینه برابره شي.
د لوګر ولایت د مس عینک کان تړون پنځه کاله وړاندې لاسلیک شوی و، خو په یاده سیمه کې د تاریخي اثارو د موجدیت له کبله یې چارې ځنډېدلې وې.