طالبان وایي، ځينو رسینو داسې مواد خپرول، چې زموږ د ټولنې دیني احساسات یې مجروح کول او زموږ ملي امنیت یې ګواښه
د طالبانو د سرپرست حکومت د استخباراتو مسؤلین وایي، چې ځينو رسینو داسې مواد خپرول، چې زموږ د ټولنې دیني احساسات یې مجروح کول او زموږ ملي امنیت یې ګواښه، تر څنګ یې فتنه ګرو عناصرو ته د اسلامي امارت په خلاف د پروفاګند او تخریبي اعمالو لپاره بهانه په لاس ورکوله.
هغوئ په یوه خپره کړې اعلامیه کې زیاتوي، چې د افغانستان اسلامي امارت اړونده ارګانونو له دې رسنیو سره پرلپسې ناستې تر سره کړې او هڅه یې وکړه چې د تفاهم له لارې رسنۍ د داسې غير شرعي او زموږ د ملي امنیت د ګواښونکو برنامو له نشر څخه را وګرځوي.
متأسفانه چې دوئ له ژمنو سره سره خپلې ستونزې حل نکړې، هماغه وو چې اسلامي امارت اړونده ارګانونو د خپل هیواد د ملي امنیت د ساتلو په موخه يو لړ اقدامات ترسره کړل.
طالبان زیاتوي چې موږ د اسلامي شریعت په حدودو کې د بیان ازادۍ ته ژمن يو، خو هیچا ته د دې اجازه نه ورکوو، چې په بېلا بېلو پلمو زموږ اسلامي او ملي ارزښتونه تر پښو لاندې کړي، زموږ د ولس فکري امنیت او په لویه کې زموږ ملي امنیت وګواښي.
دا په داسې حال کې ده، چې طالبانو دوه ورځې وړاندې د طلوع نیوز خصوصي ټلویزیون رئیس او دوه کارکونکي نیولي وو، چې له څو ساعتونو وروسته یې بېرته خوشې کړل.