د افغانستان لپاره د امريکا ځانګړی استازي تازه څرګندونې
ټوماس ویسټ ويلي نړۍ واله ټولنه بايد په افغانستان کې ښکېله پاتې شي.
د افغانستان لپاره د امریکا ځانګړی استازي ټوماس وېسټ ويلي، د اوسلو د ناستې یو ښکاره پیغام دا و چې نړۍ واله ټولنه باید په افغانستان کې ښکېله پاتې شي.
نوموړي په خپله ټوېټرپاڼه لیکلي، چې د افغانانو تر منځ باید د دوی د هېواد د سیاسي راتلونکي په هکله پراخې سلا مشورې وشي.
ټوماس وېسټ ټينګار کړی چې خپلسرې نیونې باید ختمې شي، بشري حقونه باید وساتل شي، د ښوونځیو پرانېستل او د بشري حقونو رعایت باید د افغان ملت لپاره د لمړیتوبونو په سرکې وي.
په ناروې کې د طالبانو حکومت استازو، بهرنيو او په ياد هېواد کې د افغان مدني فعالانو ترمنځ درې ورځنۍ ناسته وشوه.
طالب حکومت بیا وايي دغه ناسته د افغانانو په ګټه وه او له ځان سره ښه زيری لري.