بريټانيا تازه د مرستې اعلان وکړ
د چټکو مرستو د نشتوالي په صورت کې د افغان ماشومانو د مړینو د زیاتوالي له خبرداري وروسته، تازه د بریټانیا دولت اعلان کړی چې له افغانستان سره خپلې مرستې زیاتوي.
د بریټانیا د بهرنیو چارو وزیرې، لیز تراس ویلي چې په افغانستان کې د فقر او بې کارۍ له وجې ځینې خلک ان د خپل بدن غړي پلوري چې دا د ډيرې اندېښنې وړ موضوع ده.
په افغانستان کې د یو میلیون ماشومانو د احتمالي مړینې د راپور له خپرېدو وروسته، د بريټانيا د بهرنیو چارو وزيرې اعلان کړی چې له دغه هېواد سره د ماشومانو د ژوند ژغورلو په خاطر ر، په خپلو مرستو کې سل میلیونه پونډه اضافه کوي.
بريټانيا دا مرسته داسې مهال اعلانوي چې تر دې وړاندې د ملګرو ملتونو سازمان د عمومي منشي پخواني مرستیال اعلان کړی و چې له افغانستان سره د چټکو مرستو د نه ترسره کېدو په صورت کې به، په دې هېواد کې تر مارچ میاشتې پورې درې میلیونه ماشومان له سختې خوارځواکۍ سره مخ شي.