امریکایي وګړي: بایډن ډاکو او نړیـوال غل دی
د امریکا د ولسمشر جوبایډن پرېکړه د امریکایانو له غبرګونونو سره مخ شوې. د افغانستان د شتمنیو په اړه د جوبایډن هغه پرېکړه په نړیواله کچه له غبرګونونو سره مخ شوې ده چې د افغانستان د ګنګل شوې بودیجې په اړه یې کړې ده.
امریکایي وګړو د ټولنیزو رسینو له لارې د خپل ولسمشر پرېکړه غیر انساني او غیر عادلانه بللې او هغه یې په بېلابېلو سپکو الفاظو غندلی دی. ځینو ورته د ډاکو او ځینو بیا ورته د نړیـوال غله لقبونه کارولي دي.
د امریکایي رسنیو راپورونه وايي، چې بايډن په ټولنیزو رسنیو کې هېڅ وخت دومره نه و سپک شوی، لکه په دې پرېکړه چې غندل کېږي.
په ویلسن څېړنیز مرکز کې د افغانستان د مسایلو څارونکي مایکل کوګلمن هم په یوه ټوېټ پیغام کې ویلي چې د جوبايډن دغه پرېکړه غیر انساني او غیر اخلاقي ده چې ان امریکايي وګړي یې هم مخالفت کوي.
کوګلمن زیاتوي دا د افغانستان د خلکو پیسې دي او د سپټمبر د ۱۱ د پېښې د قربانیانو کورنۍ هم غواړي چې دا پیسې د افغانستان خلکو ته ورکړل شي