یعقوب مجاهد: موږ هڅه کړې چې سرحدونو کې جنجال رامنځته نه شي
د طالبانو د سرپرست حکومت د ملي دفاع سرپرست وزیر ملا محمد یعقوب مجاهد وایي، چې موږ ډېره هڅه کړې چې د هېواد په سرحدونو کې جنجال رامنځته نه شي،
ملا یعقوب له ملي ټلویزیون سره په تازه مرکه کې ویلي، ډېره هڅه کړې چې د هېواد په سرحدونو کې جنجال را منځته نه شي، خو له بده مرغه ځینې وختونه چې د ګاونډیو هېوادونو له لوري په سرحدونو کې جنجالونه رامنځ ته کیږي، ځینې غیرې قانوني کړنې ترسره کېږي چې موږ یې مخه نیسو بیا د ګاونډیو هېوادونو پولیسو ډزې کړي، موږ ځوابیه ډزې کړي، ازبکستان سره زموږ جنجال د یو کس په وژل کېدو او یو بل کس ټپي کېدو باندې راپورته شو، موږ له ازبکستان څخه د وژل شوي او ټپي کس تاوان واخیسته.
د طالبانو د سرپرست حکومت د ملي دفاع وزیر همداراز زیاتوي چې تراوسه له ګاونډيو هېوادونو څخه د افغانستان هیڅ حکومت د کوم وژل شوي افغان تاوان نه و اخیستی، موږ له هیچا سره جنجال نه غواړو، خو که زموږ په خاوره تیری کیږي، یا زموږ خلکو ته تاوان رسوي، بیا موږ له هیچا کم نه یو