ژوند د ماشوم په اوږه ناسته ښارو
ژوند د ماشوم په اوږه ناسته ښارو
جنګ لکه غشی د ړانده ښکاري
ژوند د رنګه کاغذ پران په څېر
جنګ دی د تېزې بوړبوکۍ مثال
ژوند د ټیکري پیڅکه کې غوټه روپۍ
جنګ د بوډۍ مخ ته جسد د لمسي
ژوند په مزرین څپر کې ناست ملګري
جنګ په قبرونو کې ویده ځوانان
ژوند د لونګو د چای ډک ترموز
جنګ د باران د ډنډ مردارې اوبه
ژوند د توتانو سره څښل د شړومبو
جنګ د مرمیو سره شغ د وینو
ژوند په سوکړک مستې غوړي ګډول
جنګ په هډوکو کې چنجي ګډول
ژوند لکه زمونږ په (می خیرنې) وریجې
جنګ لکه زمونږ وران شوی باغ د بادام
ژوند د ادکې د قربان غږ
جنګ د ادکې د های های چیغې
ژوند لکه یخ کې د چرګۍ غاړه
جنګ لکه یخ کې تر سهاره مزل
ژوند ماشومتوب کې د مورکۍ غېږه
جنګ د تیارې او تنهایئ غېږه
ژوند د جانان په غاړه لاس اچول
جنګ د جانان مړي ته سر شوکول
ژوند د لالی تازه پوسټ کړی انځور
جنګ د جانان ناځواب کړی مسیج
ژوند د تپې په سر بنډار جوړول
جنګ په چاودنو کې امبار د مړو
ژوند د سهار نسیم ته سر وچول
جنګ د غرمو په باد د زلفو شیندل
ژوند د زلمي په خپله خوښه واده
جنګ په میئنه جینۍ بن کول
په پای کې ژوند د جنتونو کیسې
په پای کې جنګ د دوزخونو تصویر
قدرت الله درمان