ممکن راتلونکې اونۍ په امريکا کې افغان سفارت وتړل شي
يو امريکايي چارواکی وايي افغان سفارت ممکن راتلونکې اونۍ د سختو مالي ستونزو له کبله وتړل شي.
د امريکا د بهرنيو چارو وزارت يو لوړپوړي چارواکي د نوم نه ښودلو په شرط فرانس خبري اژانس ته ويلي، چې ممکن راتلونکې اونۍ افغان سفارت د سختو مالي ستونزو له کبله وتړل شي او وايي افغان ديپلوماتان يوه مياشت وخت لري، چې په امريکا کې د پاتې کېدو لپاره د ويزو غوښتنه وکړي.
دغه چارواکی زياتوي چې د امريکا بهرنيو چارو وزارت له افغان سفارت سره په همکارۍ په داسې ترتيباتو کار کوي، چې له مخې یې په دغه هېواد کې د ياد سفارت د چارو تر بيا پيلېدو پورې د ديپلوماتيک ماموريت ټول ملکيتونه خوندي پاتې او په سمه توګه وساتل شي.
د معلوماتو پر بنسټ شاوخوا سل افغان ديپلوماتان د امريکا په واشنګټن، لاس انجلس او نيويارک کې ماموريت په غاړه لري.
دغه امريکايي چارواکي ويلي دي، چې ځینو افغان ديپلوماتانو دلته په امريکا کې د پاتې کېدو غوښتنه نه ده کړې او وايي يوه مياشت وخت لري، چې د پاتې کېدو لپاره خپل غوښتنليکونه د امريکا بهرنيو چارو وزارت سره شريک کړي.
د هغه په خبره که افغان ديپلوماتان له امريکا څخه ايستل کېږي، نو دريم هېواد کې به يې ځای پرځای کوي.