لوګر کې ۵ د لیک لوست کورسونه پیل شول
د لوګر په خروار ولسوالۍ کې د لیک لوست زده کړې ۵ کورسونه پرانیستل شول.
د طالبانو سرپرست حکومت د لوګر د پوهنې ریاست د رسنیو مسؤلین وایي، چې د دې ولایت په خروار ولسوالۍ کې له زده کړو بې برخې ماشومانو ته د لیک لوست زده کړې ۵ کورسونه پرانیستل شول.
هغوئ وایي، چې یاد کورسونه د پوهنې ریاست د لیک لوست زده کړې آمریت په هڅو جوړ شوي، چې تر راتلونکو نهو میاشتو پورې به دوام وکړي، د دې کورسونو په پرانیستلو سره د ۵ کلیو له زده کړو ۳۵۰ بې برخې نجونو او هلکانو ته د زده کړو کولو زمینه برابره شوه.
د لوګر د پوهنې ریاست ویاند شاپور عرب وایي، چې د دې کورسونو ښوونکو او زده کوونکو ته ټول درسي کتابونه او درسي توکي هم د لیک لوست زده کړې آمریت له خوا ورکړل شوي دي.
د لوګر د پوهنې ریاست د لیک لوست زده کړې آمر مولوي سردار احمد آخند زاده وایي، چې یاد کورسونه يې د پوهنې ریاست مقام د لارښوونې او قومي مشرانو د غوښتنې له مخې جوړ کړي دي.
خراور د لوګر له مرکز څخه یوه لرې پرته ولسوالۍ ده چې اکثره وګړي یې له زده کړو او روغتیایي خدماتو محروم دي.