د پير محمد کاروان نوی شعر
وچ لفظونه په نغمو باندې لامده دي
سره ګلونه په وږمو باندې لامده دي
یو موسم دی چې مو زړونه هم د یو بل
په خوږو خوږو لېمو باندې لامده دي
پر تبجن تندي مې ږده ساړه لاسونه
چې د خدای په کرشمو باندې لامده دي
د خوبانو د نرۍ ژبې سرونه
بس لګیا دي په پلمو باندې لامده دي
د زړګیو دا پولۍ پولۍ ورغوي
په خولو د سرو غرمو باندې لامده دي
دا متنونه ماتوي تنده د تږو
په اوښلنو کلمو باندې لامده دي
سرودونه د کاروان، د غره په سر کې
د ځنګل په زمزمو باندې لامده دي
شاعر: پير محمد کاروان
