د اوکراین ولسمشر پوتین سره هر ډول خبرو ته چمتووالی ښودلی
د اوکراین ولسمشر وايي، چې چمتو دی، د دونباس سيمې او کریمیا ټاپووزمې په هکله له پوتین سره خبرې وکړي.
د ۲۴ فرانس د يو راپور پر بنسټ د اوکراین ولسمشر ویلادیمیر زلنسکي ويلي، چې د روسيې ولسمشر ويلاديمير پوتين سره د سولې په هکله هر ډول خبرو اترو ته چمتو دی.
دغه راز زلنسکي خپل روسي سیال پوتين سره د سولې مخامخ خبرې د سې شنبې ورځې ته وغځولې او ويلي دي، چې د روسیې له لوري د اشغال شوې کریمیا د اوسني وضعيت او په دونباس سيمه کې د دوو مسکو پلوو جمهوريتونو په هکله ښايي د يوې ټولپوښتنې له لارې خبرې اترې وکړي.
د اوکراین ولسمشر رسنیو ته په خبرو کې ويلي، چې دی د ورانونکې يوې مياشتنۍ جګړې د ختمولو لپاره هر ډول خبرو اترو ته چمتو دی.
ويلادیمیر زلنسکي داسې مهال له روسي سیال سره د هر ډول خبرو وړاندیز کوي، چې د اوکراین او روسیې ترمنځ د روانې جګړې نږدې مياشت وشوه او له امله يې سلګونه تنه عام خلک مړه، ميليونه وګړي کډوال او لسګونه ودانۍ ويجاړې شوې دي.