پر روسیې د امریکا تازه بندیزونه
د امريکا ولسمشر تازه پر روسیې د نفتي توکو په روارداتو بنديزونه وضع کړل.
د امريکا ولسمشر جو بایډن په يو تازه اقدام کې څرګنده کړې، چې پر روسیې يې د تېلو، ګازو، ډبرو سکرو، نفتي موادو او همدارنګه پر وارداتو یې بنديزونه لګولي دي او وايي امريکا نه غواړي په اوکراین کې د روسیې د جګړې ماشين قوي کړي.
ددې تر څنګ له امريکا وروسته انګلستان هم اعلان وکړ، چې د روسیې په وارداتو او نفتي موادو اوس مهال په موقتي ډول يو کلن بنديز لګوي؛ خو وايي د همدې کال په پای کې به دا بنديز دايمي اعلان کړي.
په نړۍ کې د روسیې تر ټولو سترې عايداتي سرچينې نفتي مواد او ګاز دي او له همدې درکه له اروپا او امريکا پيسې ترلاسه کوي، چې دا یې د اقتصاد ستره برخه جوړوي؛ خو اوس ښايي په امريکا او د متحدو هېوادونو په بازارونو کې یې د تېلو او ګازو بيې لوړې شي.
له دې سره به د روسیې اقتصاد هم سخته ضربه وويني؛ ځکه نور نه شي کولای په اروپا او امريکا خپل نفتي مواد وپلوري.